ريحة ريحان

بسم الله الرحمن الرحيم

السلام عليكم

ريحة ريحان تملا المكان لكن المكان جنينة مدرستنا والزمان فى لحظة من عمرنا ورياح الربيع تطيح بريحة الريحان و تتوه وسط النسيم تسافر لكن الريحان ريحته فيه

دى حتة مقدمة كدا عشان كل اللى يخش يقول ايييييييه الحلااااااااوة دىىىى

انا دلوقتى فى 3 اعدادى..وفاضل اسبوع و اغيب عن المدرسة ومش هروح غير فى الامتحانات ان شاء الله

انا وصحابى هنتفرق فينا اللى تروح تمريض واللى تروح دبلوم فنى واللى تروح ثانوى

 زمان لما كنت فى اولى اعدادى كنت الاقى فى اواخر السنة طلبة سنة تالتة بيحضنوا بعض ويبوسوا بعض وابقى مستغربة

بس انا مليش صحاب كتير..هما اتنين بس اللى بكلمهم واتنين مش بكلمهم كتير بس هنكون فىم درسة وحدة ان شاء الله وحدة الاولى ع المدرسة وصاحبتها طالعة التانية..وكمان فى بنت بنروح مع بعض ونيجى مع بعض عشان من نفس طريقى...فهيبقى الفراق مش صعب اوى عشان مليش صحاب كتير

________

بلاش حكايت 14 سنة دى عشان انا خلاص كملت 15

فى مرة كنت بكلم وحدة صحبتى كانت بتقولى عندك كم سنة

قلتلها 15

قالتلى بحب السن دا..حلو

*حسيت بقيمة سنى لازم اعيش كل لحظة فيه مش هرحمه ..فعلا سن 16 او 17 بيبقى الواحد عامل زى الحيطة ومش بيقدر يلعب زى دلوقتى

ـــــــــــــــــــــــــــــــــــ

فيه ناس كتير بتقول انها مش مرتاحة فى المرحلة العمرية من12-18 دى وان الطفولة احلى

انما انا شايفة ان مرحلتى العمرية جميلة

لان فيها تطور فكرى ونمو ذاتى..الشخصية بتتكون والميول بتظهر والمواهب تلمع

يعنى انا مثلا وانا طفلة..مكنتش بتأمل ولا اسرح..مكنتش بكتب الخواطر ولا ارسم نفسى وارسم الطبيعة

بقيت انسانة بمعنى الكلمة من الناحية النفسية

ومستوايا الدراسى كمان بئا احسن الحمد لله

كمان ظهر التمرد..انا غلبااااااااانة دا تمرد صحبتاتى البناتيت عالمدرسين..بقيوايشتموا عالمدرسين من وراهم ويقولو اسمهم كدا منغير القاب ومش بينضربوا ويردوا عالمدرسين ويغيظوهم ويندسو زى الفئران تحت الديسك يضحكوا عليهم ويجيبوا صور تامر حسنى معانا المدرسة واحيانا احمد عز..انا طبعا ببقى متغاظة مش لانهم بيخالفوا قوانين المدرسة..ببقى متغاظة عشان مبحبش تامر ولا احمد عز

هههههههههههااااااى

__________________________

لازم لما امشى من اعدادى اخد معايا اى حاجة للذكرى احتفظ بيها عشان لما اكبر امسح بيها دموعى وافتكرها..او اخبى بيها ضحكتى اللى بضحك فيها على ذكرياتى وقفشاتى

افتكرت مدرسة الرسم بتاعت ابتدائى اللى كانت بتقولنا ان عند كل مناسبة تجيب وردة وتحطها فى كتابها وتحتفظ بيها

اتعلمت دا من جناينى الجامعة لما كانت فى الكلية..ادعوله بالصحة لو كان عايش او الرحمة لو كان ميت

المس وصتنا ندعيله

فأنا دايما كنت الاقى زميلتى اللى بروح البيت معاها بتقطف ريحان المدرسة لما نطلع من المدرسة

كان بيصعب عليا الريحان..نبات بتموته عشان تشتم ريحته واول ما يدبل ترميه

دا كائن حى

 انما دلوقتى بفكر اقطف عود ريحان من هناك واحتفظ بيه بين احضان كتابى

يكسر وحشته وترابه اللى هيتكون ويتكوم اكوام عليه فى المستقبل ان شاء الله

نفسى تكون اول واخر مرة اموت نبات

توبة يا دموعى

هتكون ذكرى جميلة عطرة..هحضنا منا حضنى يكفى ذكريات 100 سنة ويساع من الحبايب والعدوين الاف

قد ايه حاجات بسيطة بحتفظ بيها حتى لو ملهاش ذكرى..من وانا صغيرة كل ما الاق حاجة صغنونة وخفيفة ومميزة نوعا ما بشيلها عندى

ان شا الله تكون خرزة مقطوعة من بدلة

وعود الريحان دا اللى ياما تغنوا له شعراء الريف وتماوجت انغامهم على الاذان تسكر وتسحر بعتبره اغلا من الماس

ومش انا بس..الشعرا كمان والرسامين

غيرنا بيشوفنا بنقدر حاجات ملهاش قيمة بيستهزئ بينا واحنا بنعتبره متبلد الاحساس

نفسى اسال سؤال؟؟

ليه فى تكريم الاوائل بيعطوهم هدايا اقلام او ميداليات او او

ليه مش بيجيبولهم هدايا رقيقة.. ورد مثلا

اشمعنا احنا فى عيد الام نجيب للمديرة ورد؟؟

ــــــــــــــــــــــــــــــ

معلش مدونتى مفيهاش مظاهر جمال كتير انا كتباها يا دوب هنا